कांण

संकर घणो जीवट रो मिनख। दुनियादारी री बातां रा जोड़-बाकी करणै मांय हुंस्यार। बात रो मोड़ कीनैं घूमैलो, पैली इज कूंत लेवै। अर इज कारण कै बास- गुवाड़ रा मिनख उण री कदर करै।
संकर सगळां रै इज काम आवै। किणी रै साथै ईसको नीं। किणी रै साथै दुसमणी नीं। अेक दीठ सूं सगळां नैंदेखै। उण री इण दीठ पाण सदीव ताकड़ी रा पालड़ा बरोबर रेवै। कीनैं इज काण नीं हुवै।
रोळो-बैधो हुवो चाये पांती-पूळी। संकर री पूछ रैवै। संकर इज आपरी पूछ रो मतळब जाणै। आपरै घर रो कामखोटी कर` इज चौधर मांय पूगै। बो सोचै जे उण री बात सूं रोळो-बैधो मिट` राजी-खुसी किणी रो बसेपो हुवैतो इण सूं बो ठाडो के धरम कर सकै? मिनखां री राड़ मिनख इज सलटाया करै। राखस तो सदीव राड़ मांयबधेपो चावै।
संकर आपरो नेम धरम बणा राख्यो कै बो कदे इज किणी रै पख मांय झूठ नीं बोलसी। किणी कानी अपणायतसूं नीं झुकसी। बात री कीमत सदीव राखसी। खरी बात सौ टकां री।
संकर रै दोय बेटा। मोबी पोकरियो अर नैंनको बीरमियों। पोकरियो कीं स्याणू-सुपातर अर बीरमियों कुचमाद रीजड़। चालतो बाड़ सागै राड़ कर लेवै। कोई बोलै तो सामलै मांय इस्सी करै कै कुत्ता इज को खा नीं।
कुण माथै लागै बीरमियैं रै? गोबर मांय भाटो मार्यां छांटा तो आपरै इज लागै। सगळा आंतरो देवणू चावैबीरमियैं सूं।
फूट्या भाग संकर रा कै बीरमियैं जेड़ो अवतार उणरै घरां आयो। संकर रै माण मरजाद पाण सगळा बीरमियैं रीबात गई करज्या। बात आगै को बधावै नीं अर उण री कुचमाद माथै बठै इज धूळ दे देवै। ओळमो संकर कन्नैको पूगै नीं।
पण पोकरियो खरो। आपरै गेलै जावै अर गेलै आवै। किणी सागै बोलै तो इज लुळताई सूं। काम रो घणो कारू।ईंटा रै थपार मांय रोजीना पांच-सात हजार इंर्ट अेकलो थाप देवै। फसलां री कटाई दोय मिनखां जितीअेकलो कर दे। कूंटल री बोरी मगरां माथै अेकलो मेल` चित मारै। मारै क्यूं नीं दोलड़ा हाडां रो धणी। संकररै पूठ रा सगळा काम साम्है पोकरियो।
अेक दिन गुवाड़ मांय किलको मंडग्यो। दारू पीयेड़ो रामलो बीरमियैं रै माथै लागग्यो। थोड़ी घणी हाथापाई इजहुगी। रामलै री पट अर बीरमियैं री चित।
बीरमियों हळको पड़ग्यो। डील रो इज रामलो भारी। सामणूं हुयो कोनी। कुचमादी बीरमियैं रै स्वाभिमाण नैंधक्को लाग्यो। सगळै दिन आकळ-बाकळ हुयेड़ो फिर्यो।
आथण सी री बात। उडती सी खबर आयी तो भचीड़ माचग्यो। बीरमियैं रामलै रै घरै जाय` पटपड़ी मांय लट्ठरी दे मेली। रामलै रो होस उडग्यो। अर बीरमियों.... बीरमियों दाकळ मारतो आपरै घरां।
कुण संभाळै दारू खोरियै रामलै नैं ? अर कुण काढ़ै घर सूं बीरमियैं नैं? पण गावं-रामं मांय ईंया थोड़ी हुवण दियाकरै। कीं मिनख गया अर रामलै नैं संभाळ्यो। कुणी संकर नै इज बुला` लियायो।
दारू पियड़ै रामलै रै लट्ठ री जबरी लागी। घणां उपाय कर्यां इज होस को आयो नीं। चोटी-कान सगळा खें`चरधापग्या।
आखर सै` अस्पताळ ले जावणूं पड़्यो।
लड़ाई रो सोदो मान` अस्पताळ वाळा रामलै नैं बिंना पुलिस रपट भरती को कर्यो नीं।
इब कांई हुवै? इलाज तो जरूरी। जे टेमसिर इलाज नीं मिल्यो तो.... सगळा चिंत मांय पड़ग्या।
पुलिस मांय रपट लिखाणी पड़ी। दारू पीयेड़ो आखड़` पड़ग्यो रामलो। पक्कै भाटै माथै पड़्ग्यो हो जबरी लागी।रपट गांव वाळा कानीं सूं संकर लिखायी।
करणी रो माड़ो हुवणो हुवै तो हुज्या। अर बो इज हुयो। रामलो चालतो रैयो। सगळी बात ऊकचूक हुगी।
मून कर्यां बैठ्या रामलै रा छोरा इज संकर माथै ताचक्या। पुलिस-थाणै रो खेल मांड दियो।
बीरमियैं लट्ठ री दे रामलै नैं मार्यो। चलगत रै पाण थाणै मांय झूठी रपट लिखा` आपरो बंचारो कर्यो होसंकर। इण रो छोरो हत्यारो। गिरतार करो। हथकड़ी घालो।
गांव मांय पुलिस बड़ी। बा इज संकर रै घरां।
''कठै है बीरमियों ..... अर थूं इज थाणै चाल झूठी रपट लिखावै.....`` पुलिस वाळा संकर माथै चढग्या।
''सा, बीरमियों........... बीरमियों। उण रो दोख नीं हो.........`` संकर आकळ-बाकळ हो` बोल्यो।
''बो तो न्याव थाणै मांय अर कचहरी मांय हुसी। है कठै बीरमियों, पकड़` घालो साळै नैं जीपड़ी मांय........`` पुलिस वाळै री बोली आपरै रंग मांय आयी।
संकर नैं हथकड़ी घालीजेड़ो आपरो लाडेसर बीरमियों दिखण लागग्यो। आगै जेळ.... संकर चेता चूक सोहोग्यो।
''सा`, बीरमियों तो हिसार भरती है। अस्पताळ मांय ओपरेसन हुयो है। पोकरियो इज बठै है। हिसार सूं अठै बोदो सौ किलोमीटर ओपरेसन हुयोड़ो किंया आय सकै ? रामलै रा छोरा झूठ केवै।`` संकर गोटी खेली।
घर रै आंगणै मांय संकर गयो। कोठै मांय ल्हुकेड़ै बीरमियैं अर पोकरियै नैं लैरली बाड़ उपरां कूद` भाजण रोहुक्म दियो अर आप अलमारी खोल` नोटां री गड्डी खुंजा मांय घाली।
पुलिस वाळो अेक हाकम अर संकर अेक कानी खुणै मांय खड़्या कीं ताळ बतळाया। गड्डी री जगां बदळगी।पुलिस वाळै री खुंजा कीं ऊंची हुगी।
दूजै दिन गांव वाळा सुण्यो` हिसार रै अेक निजू अस्पताळ मांय बीरमियैं री कीं चीराफाड़ी हुयी है अर बो बठैभरती है। लारलै दो दिनां पैली रो ओपरेसन दिखाइज्यो है। संकर खासा पीसा दिया बतावै अस्पताळ रै डाकदरांनैं।